Kann ikki viðgera mál, sum rætturin hevur avgjørt

Danski løgmálaráðharrin, Nick Hækkerup, sigur seg einki kunna gera við tað, at fólk eru ákærd í nógv ár, áðrenn tey so verða frídømd.

Tað er ikki rætt, at fólk bíða so leingi, sigur hann, men hann kann ikki taka upp mál, sum rætturin hevur avgjørt, sigur hann.

Nick Hækkerup hevur svarað einum spurningi frá Sjúrði Skaale, fólkatingsmanni.

Sjúrður Skaale spurdi, um tað er rætt, at fólk eru ákærd í sjey ár, og síðani verða frídømd. Spurningurin er yvirskipaður, um fólk eiga at bíða í nógv ár frá tí, tey eru ákærd, til tey eru dømd.

Dómar í Eik-málinum

Dømið í spurninginum er úr Eik málinum, sum byrjaði í 2012. Ikki fyrr enn í november 2018 blivu tveir ákærdir í tí málinum frídømdir.

Hetta er ikki eindømi í Føroyum, sigur Sjúrður Skaale.

Sjúrður Skaale ætlar tó ikki at sleppa málinum her, hóast ráðharrin hevur svarað.

- Tá fólkatingið aftur fer at virka sum vanligt, fari eg at reisa málið sum eitt spurnarorðaskifti í fólkatinginum, sigur Sjúrður Skaale.