Strandfaraskipini taka fleiri ferðafólk

Í morgin hækkar mest loyvda ferðafólkatalið við skipunum hjá Strandferðsluni. Tað boðar stovnurin frá í dag. 

Smyril kann sigla við 500 ferðafólkum, Teisin við 150, Sam við 60, Ternan við 90, Ritan við 70, og Sildberin kann sigla við við 30 ferðafólkum. 

Harumframt verða allar salongir og øll dekk latin uppaftur.

Heitt verður kortini á ferðafólk um at halda frástøðu uppá í minsta lagi ein metur, og at hava gott reinføri.

Síðan á grækarismessu hevur virksemið hjá Strandferðsluni verið skert fyri at avmarka Covid-19 smittuna.