Váðaráðið: Peningastovnar framvegis væl fyri

Hóast korona nú hevur verið í skjótt tríggjar mánaðir, eru peningastovnarnir í Føroyum væl fyri at geva húsarhaldum og fyritøkum, sum koronutilbúgvingin hevur rakt, neyðugu hjálpina.

Tað sigur Føroya váðaráð.

Ráðið metir framvegis ikki, at tekin eru um systemiskar váðar í føroyska bankageiranum. 

Lítil útlánsvøkstur

Útlánsvøksturin er framvegis lítil. Hann var null prosent við árslok 2019, men trý prosent, tá donsku peninga- og realkredittstovnarnir eru taldir við. Sama gongdin var í fyrsta ársfjórðingi í ár. 

Útlánini hjá føroysku peningastovnunum vóru 89 prosent av bruttotjóðarúrtøkuni í 2019 og 96 prosent í 2018. Vøksturin í innlánum er eisini minni.

Nú negativ renta er fyri innlán, eru vinnan og húsarhaldini farin at gjalda skuld í staðin fyri at seta pengar inn, sigur Váðaráðið.