Øll skulu í masku á flogvøllinum

Tað skrivar Vága Floghavn í kunngerð í dag. Tó so eru børn undir 6 ár og fólk, sum hava trupulleikar við andaleiðini, undantikin hesum reglunum. 

Umframt at ganga við andlitsmasku á flogvøllinum, skulu ferðandi eisini vænta at vera í masku umborð á Føroyaleiðini. 

Nýggju reglurnar koma í gildi í morgin, tá ið Føroyar samstundis verða latnar upp fyri ferðafólki úr Danmark, Grønlandi, Noregi, Íslandi og Týsklandi. Hesi ferðafólk skulu vísa eina negativa koronakanning á flogvøllinum, sum ikki skal vera eldri enn fimm dagar. Men hava tey onga kanning, verða tey kannað á flogvøllinum. 

Skulu føroyingar út at ferðast, skulu tey hava eina váttan fyri, at tey hava bústað í Føroyum. 

Tað verður framvegis ikki loyvt øðrum enn ferðafólki, starvsfólki og viðskiftafólki við serligum ørindum at uppihalda seg inni í farstøðini í Vága Floghavn. Avvarðandi verða biðin um at bíða uttanfyri, eins og hýruvogsførarar og aðrir førarar eisini skulu bíða uttan fyri farstøðina. 

Hoyr meira í útvarpstíðindunum klokkan 18.00.