Tunnilin skal venda fólkagongdini

Ein undirsjóvartunnil til Suðuroyar skal venda gongdini í fólkatalinum í Suðuroynni. Tað er yvirskipaða svarið, sum Bárður á Steig, løgmaður, hevur givið Heðini Mortensen, løgtingslimi. 

Heðin Mortensen spurdi løgmann, hvørji tiltøk landsstýrið ætar at seta í verk til tess at venda gongdini í fólkatalinum í Suðuroynni. 

Yvirskipað er svarið eitt væl útbygt og væl virkandi samferðslukervi, har oyggjarnar verða knýttar saman, hevur alstóran týdning fyri vinnuna og trivnaðin kring landið, skrivar Bárður á Steig Nielsen.   

Fimm milliónir settar av í ár

Løgmaður vísir á, at samgongan er samd um at tryggja hóskandi ferðasamband kring alt landið, herundir íløgur í tunlar og undirsjóvartunlar. Ein Suðuroyartunnil er ein týdningarmikil partur av komandi samferðsluútbyggingum í Føroyum.

Á fíggjarlógini fyri 2020 hava forkanningar og fyrireikingar til Suðuroyartunnil fingið sína egnu høvuðskontu, og hevur samgongan sett fimm milliónir krónur av, soleiðis at hildið kann verða fram við at gera forkanningar og at fyrireika Suðuroyartunnilin.

Tá hesar kanningar eru gjørdar, kunnu veruligu fyrireikingarnar til ein Suðuroyartunnil byrja, skrivar  Bárður á Steig Nielsen, løgmaður, í svarinum til Heðin Mortensen, løgtingslim.