Serfrøðingur ivast í nyttuni av munnbindi

Tað er ivasamt, hvør nytta er í maskum ella munnbindum ímóti koronusmittuni.

Tað sigur svenski smittuverjuserfrøðingurin, Anders Tegnell, við týska blaðið, Bild.

Hann vísir á, at hóast lond sum Belgia og Spania hava mælt fólki til at nýta masku ella munnbind í almennu ferðsluni, so økjast tilburðirnir av koronu. Og nú smittan aftur breiðir seg í Aarhus í Danmark, hava myndugleikarnir har mælt fólki til at nýta masku.

Eingi prógv

Anders Tgnell, sigur, at eingi prógv eru fyri, at maska ella munnbind verja fólkímóti smittuni, og tí eru hansara ráð framvegis at fólk halda frástøðu, og ikki koma ov tætt saman.

Hann sigur seg sakna kanningar, sum kunnu prógva, hvør dugur er í maskum ella munnbindum. Fyrr enn tað er greitt, fer hann ikki at mæla svensku myndugleikunum til at biðja fólk nýta masku ella munnbind.

Tilmælið til svensku myndugleikarnar er framvegis at heita á fólk um at halda frástøðu, sigur hann.