Væntar at fáa álit seinnapartin

Jógvan á Lakjuni, løgtingsformaður, væntar at fáa álit frá trivnaðarnevndini og fíggjarnevndini til uppskotini, sum vórðu løgd fram fyrrapartin, til tingfundin, sum er settur at verða klokkan 15.

Øll trý málini, sum hava samband við koronu, vórðu løgd fram fyrrapartin. 

Tingið samtykti at víkja frá øllum tíðarfreistum, og fór tí beinan vegin at viðgera málini. Fyrsta viðgerð endaði um tvey tíðina.

Farin í nevnd

Uppskotini um dagpening í sambandi við Covid-19  og lønarískoyti til pensjónistar, sum hava inntøkumiss av koronu, eru beind í trivnaðarnevndina, og uppskotið um eykajáttan er farið í fíggjarnevndina.

Tá álitini eru løgd fram, verður nýggjur tingfundur ásettur, har málini fáa aðru viðgerð.

Av tí at samtykt er at víkja frá øllum tíðarfreistum, kann væntast, at øll trý málini verða avgreidd í dag.