Raðfesta Karlstad-tænastuna í Sernámi

Mett verður, at Karlstad-tænastan í dag er í einari tryggari legu, enn hon hevur verið.

Karlstad-tænastan verður raðfest í Sernámi.

Tað sigur Jenis av Rana, landsstýrismaður, í svari til Djóna Nolsøe Joensen, løgtingsmann.

Stimbrar mál og talu

Karlstad-skipanin er eitt amboð, sum verður brúkt at stimbra málið, taluna og aðrar samskiftishættir hjá børnum og vaksnum.

Foreldur hava gramt seg um, at nógv børn ikki fáa hjálp eftir Karlstad-skipanini, og at tey fáu, sum fáa hjálp, fáa ov fáar tímar.

Sernám sigur, at í løtuni eru tíggju Karlstad-netverk í landinum.

Fleiri fundir

Jenis av Rana sigur, at fundur var 8.juli, har hann og aðalstjórin hittu umboð fyri Sernám, Javna, Autismufelagið og foreldrabólkin hjá børnum, sum hava Down syndrom. 

Á næsta fundinum er ætlanin, at eisini onnur, sum varða av økinum, og sum hava biðið um at vera við, vera við.