Korona hóttir Norwegian

Koronufarsóttin hóttir tilverugrundarlagið hjá norska flogfelagnum Norwegian. 

2020 skuldi eftir ætlan vera eitt tað besta árið hjá felagnum yvirhøvur, men nú roknskapurin fyri fyrra hálvár er kunngjørdur, vísir hann 3,8 milliardir kr. í halli. 

Tað skrivar check-in.dk.

Bara átta flogfør

Tá koronufarsóttin herjaði frá mars til juni, hevði Norwegian bara átta flogfør á flogi. Og tað sæst aftur í roknskapinum, har umsetningurin er minkaður 65 prosent samanborið við fyrra hálvár í fjør.

- Fyrst í hesum árinum væntaðu vit eitt yvirskot og okkara besta summar yvirhøvur, eftir at sparitiltøk vóru sett verk og raksturin batnaði. Men so kom Covid-19, og eftirspurningurin eftir ferðaseðlum steðgaði upp alt fyri eitt, tí stjórnir í øllum heiminum settu ferðaavmarkingar í verk og herdu ferðavegleiðingarnar, sigur Jacob Schram, sum er samtøkustjóri í Norwegian.