Freistin at søkja er úti í dag

Freistin hjá sersambondunum í ÍSF og limafeløgunum í sersambondunum at søkja um koronustuðul er úti í dag.

Landið hevur latið ítróttinum fýra milliónir krónur.

Hvør felagsskapur kann fáa í mesta lagi 250.000 kr. fyri mistar inntøkur, tí kappingar eru avlýstar ella avmarkaðar.

Minsti stuðulin er 20.000 kr.

Stuðul verður latin fyri mistar inntøkur í tíðini frá 12.mars til 30.juni. 

Starvsnevndin endaliga orðið

Umsitingin hjá ÍSF innstillar til starvsnevndina, hvør skal fáa stuðul eftir reglugerð, sum ÍSF hevur gjørt.

Starvnevndin hjá ÍSF avger endaliga, hvør fær stuðul.

Hálvan juni fekk Fíggjarnevndin hjá løgtinginum at vita frá ÍSF, at tá hevði korona kostað ítróttinum í Føroyum níggju miliónir krónur í mistum inntøkum.

Yvirskipað hevði ítrótturin tá mist 2,1 mió. kr. í atgongumerkjasølu, 1,6 mió. kr. í aðrari sølu, 3,3 mió. kr. fyri tiltøk og 2 mió. kr. í stuðli frá sponsorum.