J&K Petersen skal gera tyrvingarplássið í Kvívík

Byggifelagið J&K Petersen hevur fingið arbeiðið at gera nýggja tyrvingar- og rottangaplássið hjá IRF úti í Nýggjheiðum í Kvívík.

J&K Petersen hevur eisini staðið fyri 1. byggistigi av verkætlanini, sum í høvuðsheitum fevndi um at gera byggiøkið klárt. 

2. byggistig skal vera liðugt í oktober í 2022, og tá verður tyrvingar- og rottangaplássið klárt at taka í nýtslu.

Øll verkætlanin kostar meira enn 100 milliónir kr.

Nøktar tørvin í 30 ár

Nýggja plássið verður mett at nølta tørvin næstu 30 árini, sigur IRF.

Nýggja støðin verður stór og nýmótans samanborin við tyrvingarplássini, sum verða brúkt nú.  Við at taka ímóti burturkasti innandura, kann IRF leggja seg eftir bara at tyrva í góðum veðri og á tann hátt forða fyri, at burturkast fýkur í náttúruni.

Nýggja tyrvingar- og rottangaplássið er eitt samstarv millum IRF og Tórshavnar kommunu. Verkætlanin er ikki knýtt at eini samanlegging við Tórshavnar kommunu, men partarnir hava samstarvað væl, tá ið ræður um burturkast og endurnýtslu, sigur IRF.