Hava keypt 55.000 tons av gróti aftrat

Runavíkar kommuna hevur keypt sløk 55.000 tons av gróti afturat frá partafelagnum Eystur- og Sandoyartunlum.

Tað er grót, sum liggur á Hvítanesi.

Fyri hálvum triðja mánaði síðan keypti kommunan 300 túsund rúmmetrar av gróti úr Sandoyartunlinum.

Grótið skal brúkast til havnargerðina í Saltangará og á Glyvrum.

Rinda fyri flutningin

Grótið kostar einki, men Runavíkar kommuna rindar fyri flutningin, millum annað gjøgnum Eysturoyartunnilin.

Runavíkar býráð samtykti í gjár at fíggja málið um grótið á Hvítanesi við góðum tveimum milliónum krónum í eykajáttan.

Upprunaliga var ætlanin at sigla grót av Hvítanesi inn á Skálafjørðin. Men tann ætlanin bar ikki á mál.