Fer á fund við nevndina í næstu viku

Fyrst í næstu viku fer Jørgen Niclasen á fund við nevndina í Føroya Tele eftir, at bæði stjórin og nevndarformaðurin hava sagt seg úr starvi.

Hann hevur í hesi vikuni havt drúgvan fund við Jan Ziskasen, stjóra og nevndarformannin, Ómar Svávarson, sum báðir hava sagt seg úr starvi.

- Teir hava greitt frá sínum sjónarmiðum, og fyrst í komandi viku verður støðan umrødd við nevndina, sigur Jørgen Niclasen. Hann vil kortini ikki siga nakað um, hvat tosað varð um.

Skuldi vera í gjár

Ætlanin var, at fundurin við Føroya Tele skuldi vera í gjár, men landsstýrið hevur fyrireikað fíggjarlógaruppskotið, og tí hevur ikki verið tíð til fundin, men hann verður fyrst í næstu viku, sigur Jørgen Niclasen.

Jan Ziskasen, stjóri í Føroya Tele, sigur, at hansara uppsagnartíð er seks mánaðir, og tí er virksemið á Føroya Tele sum vanligt.