Váðaráðið: Búskapurin hevur klárað avbjóðingarnar

Føroyski búskapurin hevur sum heild klárað seg væl gjøgnum avbjóðingarnar, sum koronufarsóttin hevur havt við sær.

Tað heldur Føroya Váðaráð, sum hevur havt sín 11. fund, og niðurstøðan er, at tað eru framvegis ikki tekin um systemiskar váðar í føroyska bankageiranum.

Váðaráðið sigur, at koronufarsóttin hevur verið ein negativur stoytur fyri føroyska búskapin, heldur enn ein verulig kreppa, soleiðis sum tað er í fleiri øðrum londum.

Óviss útlit

Váðaráðið staðfestir tó, at útlitini enn eru óviss, tí gongdin í fiskaútflutninginum  er treytað av, hvussu støðan við koronufarsóttini lagar seg á útflutningsmarknaðum.

Tí er ikki óhugsandi, at onkrar fyritøkur fáa trupulleikar í næstum, heldur Váðaráðið.

Men hóast óvissuna, so hava húsarhaldini varðveitt sítt bjartskygni, tí eitt nú hækka sethúsaprísirnir aftur, og nýtslan er eisini vaksin, síðani samfelagið læt upp aftur, sigur Føroya Váðaráð.