Havnarfólk og argjafólk kæra nú um Yantarnyy

Fólk í Havn og á Argjum kæra nú um gang frá russiska trolaranum, Yantarnyy, sum hevur ligið við nýggju bryggjuna í Havn síðani 8. september.

Tað boðar felagið Heimafriður frá.

Skipið heldur nógvan gang alt samdøgrið, og fólk í Havn og á Argjum fáa ikki sovið, sigur Heimafriður.

Rópa varskó

Felagið rópar varskó og heitir á myndugleikarnar um at bera so í bandi, at fólk ikki verða fyri skaðiligum larmi. Felagið biður politikararnar um at síggja til, at fólk fáa svøvnfrið og hvíldarfrið.

8. september fingu fólk í Ánunum boð um, at Yantarnyy var á veg í Norðhavnina at leggja fiskin upp har, og at tað fór at taka tríggjar dagar.

Skipið fór ongantíð til Ánirnar, men hevur ligið við nýggju Skansabryggjuna í Havn síðani, har eitt norskt farmaskip tekur fiskin frá Yantarnyy.