Japan fingið nýggjan forsætisráðharra

Tingið í Japan hevur í dag alment valt 71 ára gamla, Yoshihide Suga, til nýggjan forsætisráðharra. 

Tað skrivar AFP-tíðindastovan.

Fyrr í dag løgdu Shinzo Abe og stjórn hansara frá sær. Abe leggur frá sær, tí heilsan er farin at bila. 

Hann tók við sessinum sum forsætisráðharri í 2012, og eigur metið sum tann forsætisráðharri, ið hevur sitið longst út í eitt.

Høgra hond hjá Abe

Suga hevur verið stjórnarráðskrivari og hevur verið høgra hond hjá Shinzo Abe.

Yoshihide Suga hevur fáar uttanríkispolitiskar royndir, men hann hevur, sambært Reuters, sagt, at samgongan við USA hevur týdning fyri trygdina hjá Japan. 

Suge hevur eisini sagt, at hann vil hitta norðurkoreiska leiðaran, Kim Jong-un, at tosa um japansku ríkisborgararnar, sum í 1980'unum vórðu rændir til Norðurkorea.