1200 ringdu til Atlantsflog um dagin

Sølu- og kundatænastan hjá Atlantic Airways hevur havt úr at gera, síðani korona legði mestsum alla flogferðsluna lamna í mars í ár.

Nú eru gerandisdagurin og avgreiðslutíðin farin at líkjast sær sjálvum aftur, skrivar Atlantsflog.

Men tær umleið 700 avlýstu flogferðirnar fyrr í ár høvdu stórar broytingar við sær.

Frá hálvum mars til hálvan juli fekk sølu- og kundatænastan 21.000 teldupostar, og upp í 1.200 ringdu til Atlantsflog um dagin.

Og 10.000 tals ferðafólk bóðu um at fáa ferðaseðilin avlýstan ella broyttan hetta tíðarskeiðið, skrivar Atlantsflog.