ES viðurkennir ikki Lukasjenko sum forseta

ES viðurkennir ikki Aleksandr Lukasjenko sum forseta í Hvítarusslandi.

Tað sigur Josep Borrell, uttanríkisleiðari í ES, og sostatt hægsti diplomatur í ES.

Hann sigur, at Lukasjenko hevur ikki demokratiska heimild, sum hann tekur til, at verða sitandi sum forseti, og tí viðurkennir ES ikki Lukasjenko sum forseta. 

Sætta forsetaskeiðið

Lukansjenko fór í gjár undir sítt sætta skeið sum forseti í Hvítarusslandi, men tað varð gjørt uttan almenna fráboðan, og fleiri miðlar søgdu, at hetta varð gjørt fyri at sleppa undan mótmælisgongum.

Men eftir at tíðindini gjørdist almenn í gjár, fóru fólk aftur í hópatali út á gøturnar í Hvítarusslandi at mótmæla, og tað elvdi til nógvar fráboðanir um harðskap millum trygdardeildir og mótmælisfólk.

Eisini vórðu vatnkanónir brúktar til tess at spjaða mótmælisfólkini.