Viðgera atsóknina í París sum yvirgang

Franska løgreglan hevur handtikið tvey fólk í sambandi við atsóknina í París fyrr í dag.

Í minsta lagi tvey fólk vórðu álvarsliga særd, men tey eru ikki í lívsvanda. Bæði fólkini starvaðust í sama bygningi, sum satirublaðið, Charlie Hebdo, gjørdi fyri nøkrum árum síðani.

Franskir miðlar siga, at ein maður stakk bæði fólkini við knívi.

Franskir myndugleikar siga, at annar persónurin varð tikin á Bastille-torginum, umleið ein kilometur frá skrivstovubygninginum. Seinni varð ein persónur aftrat tikin nærindis gerningsstaðnum.

Yvirgangsálop

Myndugleikarnir siga, at málið verður kannað sum eitt yvirgangsálop. 

Løgreglan hevur avbyrgt býarpartin, har atsóknin var, og fólk hava fingið boð um at halda seg innandura. Skúlar, vøggustovur, røktarheim og aðrir stovnar hava latið aftur fyribils.

Prentaðu tekningar uppaftur

Fyrst í hesum mánaðinum prentaði satirublaðið, Charlie Hebdo, Muhammed-tekningarnar uppaftur.

Tað varð gjørt í sambandi við rættarmálið móti 14 fólkum, sum eru ákærd fyri at hava havt samband við yvirgangsatsóknina at Charlie Hebdo og at einum jødiskum handli í París í 2015.

Yvirgangsfelagsskapurin, al-Qaeda, hótti tá við at skipa fyri einari hevndaratsókn.