Trump heilsaði upp á stuðlar sínar

Donald Trump, forseti, er fyri ákoyringum, tí hann í gjár fór ein biltúr at heilsa upp á stuðlar sínar, sum standa uttan fyri Walter Reed-sjúkrahúsið, har forsetin er innlagdur við koronu.

Ein lækni á sjúkrahúsinum sigur alment, at tað er ábyrgdarleyst av forsetanum, sum er sjúkur, at biðja trygdarfólk hjá sær koma við sær í bilin, tí smittuvandin í einum so innibyrgdum staði, sum í einum bili, er stórur.

Alment hevur umsitingin í Hvítu Húsunum tó sagt, at neyðugu stigini vórðu tikin fyri at tryggja, at alt gekk rætt fyri seg, og at støðan var trygg.

Var illa fyri

Donald Trump varð lagdur inn á sjúkrahúsið við koronu í síðstu viku. Hann hevur verið illa fyri hesar dagarnar, og hevur millum annað havt tørv á súrevni. Hann hevur eisini fingið sterkan heilivág í viðgerðini. Viðgerðin hevur eftir øllum at døma gingið væl, og tosað verður um, at forsetin møguliga verður útskrivaður í dag.

USA hevur verið meint rakt av koronu. Fleiri enn 200.000 fólk eru deyð, og fleiri enn sjey milliónir eru smittað.