Einki gylt pass í ES

Kýpros fer ikki longur at útvega "gylt pass", sum geva ríkum útlendingum atgongd til innara marknaðin í ES og rætt til at ferðast frítt í samveldinum við ongum visum.

Higartil hava útlendingar, sum gera íløgur fyri í minsta lagi tvær milliónir evrur í Kýpros, fingð eitt ES-pass afturfyri.

Boðini um, at hetta nú verður steðgað, komu eftir at sjónvarpsrásin, Al Jazeera, vísti eina dokumentarsending um kýpriotisku íløguskipanina.

Í sjónvarpssendingini kom fram, at fleiri kýpriotiskir tænastumenn, politikarar, advokatar og fastognar-íleggjarar eru  uppi í eini skipan, har brotsmannalið kunnu keypa ES-pass gjøgnum íløguskipanina.

Frágreiðingar um, hvussu hendan skipanin verður misbrúkt, og hvassar atfinningar frá ES, hava eisini verið frammi.

Einki samvitskubit

Fleiri íleggjarar hava uttan samvitskubit fingið ES-ríkisborgaraskap gjøgnum íløguskipanina í Kýpros. 

Fleiri hava enntá kunnað hvíttað pening gjøgnum skipanina.

Serliga russiskir og ukreinskir miljóningar hava brúkt skipanina, og seinastu tíðina hava fólk í Kina og Kambodja eisini gjørt íløgur í Kýpros.

Kýpros hevur fingið meira enn sjey milliardir evrur í inntøku frá íløguskipanini, síðani hon kom í gildi í 2013.

Men 1. november fer skipanin í søguna, í hvussu er soleiðis, sum hon er skipað nú, skriva Reuters og Al Jazeera.