Støðan í sáttmálatrætuni er óbroytt

Einki nýtt er at frætta um sáttmálastøðuna hjá sjúkrarøktarfrøðingunum og Lønardeildini hjá Fíggjarmálaráðnum.

Mikudagin í síðstu viku vrakaði felagið hjá sjúkrarøktarfrøðingunum semingsuppskotið, men Lønardeildin góðtók tað.

Mánadagin vrakaði Lønardeildini eitt uppskot um nýggjan sáttmála fyri tann, sum fór úr gildi 1.oktober í fjør, frá sjúkrarøktarfrøðingunum.

Felagið føroyskir sjúkrarøktarfrøðingar hevur ikki lýst verkfall, og hevur sum skilst ikki gjørt av, hvat nú skal henda.

Lønardeildin ger einki, sigur Jan Mortensen, stjóri har. Hann sigur, at tey hava góðtikið semingsuppskotið og fáa ikki gjørt meira.

Vit hava roynt at fingið orð á forkvinnuna í felagnum hjá sjúkrarøktarfrøðingum, Óluvu í Gong, men tað hevur ikki eydnast.  

Terje Sigurðsson, semingsmaður, sigur, at enn er einki komið, sum gevur Semingsstovninum grundarlag til at kalla inn til nýggja semingsroynd.