Seks milliónir aftrat til Glasir

Skúladepilin í Marknagili hevur framvegis brúk fyri pengum til byggingina.

Nú verður biðið um seks milliónir krónur.

Í februar í fjør fekk Landsverk ábendingar um, at útstoypingar millum betongelement ikki vóru gjørdar eftir krøvunum í verkætlanartilfarinum. 

Kanning vísti, at allar fúgur í berandi veggjum skulu útstoypast til fulnar. 

Hetta er ein av fortreytunum fyri at fáa endaligt nýtsluloyvi til bygningin frá Tórshavnar kommunu, sigur Uttanríkis- og mentamálaráðið.

Sagt verður eisini, at arbeiðið, sum er mett at vara fýra mánaðir, er við í gerðarrættarmálinum millum Landsverk og TG-Verk.

Har fellur avgerðin fríggjadagin í næstu viku.