Magnus avloysir Edmund í fólkatinginum

Magnus Rasmussen tekur nú sæti á fólkatingi fyri Edmund Joensen, sum fer í farloyvi eitt stutt tíðarskeið frá 3. november.

Hetta er fyrstu ferð, at Magnus Rasmussen tekur sæti í fólkatinginum

Hann hevur verið løgtingsmaður síðani 2015, og á fólkatingsvalinum í fjør gjørdist hann nummar fýra á sambandslistanum við 520 atkvøðum. Edmund Joensen fekk 1883 atkvøður.

Kaj Leo Holm Johannesen og Bárður á Steig Nielsen gjørdust ávikavist nummar tvey og trý, men teir eru báðir í landsstýrinum.

Í løgtinginum er Magnus Rasmussen formaður í tingbólkinum hjá Sambandsflokkinum, og hann er eisini formaður í fíggjarnevndini.