Steingrímur gevst í íslendskum politikki

Ein tann kendasti politikarin í Íslandi, Steingrímur J. Sigfússon, hevur avgjørt ikki at stilla upp, tá altingsval verður næsta ár.

Hann hevur verið í altinginum síðani 1983. Eingin hevur verið so leingi í altinginum sum hann.

Hann hevur eisini verið ráðharri, millum annað fíggjarmálaráðharri.

Nú er hann altingsformaður.

Úr Alþýðubandalaginum

Steingrímur J. Sigfússon var fyrsti formaður hjá teimum vinstru grønu. Hann var formaður frá 1999 til 2013.

Áðrenn hann var við til at stovna flokkin hjá teimum vinstru grønu, var hann í Alþýðubandalaginum, sum upprunaliga var kommununistiski flokkurin í Íslandi.

Steingrímur J. Sigfússon, sum er føddur í 1955, stillaði fyrstu ferð upp í 1978.