22 mió. kr. til viðlíkahald í 185 bygningum

22 mió. kr. eru settar av til at halda viðlíka 185 almennar bygningar í 2021.

Hetta er 119.000 kr. fyri hvønn bygning, sum verður mett at vera alt ov lítið, sigur Fíggjarnevndin hjá løgtinginum.
 
Landsverk sigur, at stovnurin hevur avgjørt í fyrstu atløgu einki at gera við tíggju bygningar, tí standurin er so mikið vánaligur, og serlig játtan má til.

Eingin játtan til 18 bygningar

Eingin játtan er til viðlíkahald av 18 bygningum, sigur Landsverk.

Landsverk avgjørdi í 2017 at taka hond um teir bygningar, sum nakað kann gerast við.

Í 2024 er ætlanin at játta 30 mió. kr., sigur Fíggjarmálaráðið í svari til Fíggjarnevndina hjá løgtinginum.