Vilja hava betri stundir at viðgera yvirtøkumál

Uttanlandsnevndin gevur sær góðar stundir at viðgera uppskotini hjá Tjóðveldi um yvirtøkur.

Nú hevur nevndin biðið um og fingið longda freist til at skriva álit. Freistin er longd til 20.november.

Tjóðveldi vil yvirtaka politiið og landslæknan,  landslæknan longu á ólavsøku næsta ár, og politiið 1.januar í 2022.

Tjóðveldi mælir til at broyta lógina um ræði á málum og málsøkjum, so løgregla, ákæruvald og brotsmálaumsorgan og landslæknaembætið, eftirlit við heilsustarvsfólkum og stovnum á heilsuøkinum, sjúkufyribyrging, sinnissjúkraviðurskifti, líkskoðan, vevnaðarflutningur, euforiserandi evni, sjúklingarættindi og eftirgjørdur gitnaður koma undir føroyskt ræði.

120 mió. kr.

Tað verður mett at kosta 120 mió. kr. í 2022 at yvirtaka løgregluna.

Og tað verður mett at kosta 4,9 mió. kr. at yvirtaka millum annað landslæknan, sigur Tjóðveldi.

Uttanlandsnevndin hevur havt uppskotini ávikavist frá 1.september og 3.september.

Nakrar innkallingar eru eftir, og tí hevur nevndin biðið um longda freist.