- Tíðindi, mentan og ítróttur
J&K Petersen skal grava út fyri lívfiskastøðini
![](https://kvf.fo/sites/default/files/styles/grein-ovasta-mynd/public/stein_olvur_og_regin.jpg?itok=MuNsRH3h)
Bakkafrost hevur skrivað undir sáttmála við J&K Petersen um at grava og fylla út fyri nýggju lívfiskastøðini í Skálavík.
Sum liður í menningini á lívfiskaøkinum er ætlanin at savna alt virksemið, sum í løtuni er á lívfiskastøðunum, ávikavist í Skopun og við Áir.
Nýggja lívfiskastøðin skal byggjast í Skálavík, og í januar varð vegurin til nýggju lívfiskastøðina latin Skálavíkar kommunu, skrivar Bakkafrost.
Boðið út í heyst
Farið verður nú undir annað byggistig, sum er at gera økið byggiklárt, og seinni í vetur verður arbeiðið at byggja sjálva lívfiskastøðina boðið út.
Lívfiskur er serliga viðbrekin, og miðað verður ímóti at verja hann fyri smittu.
Tí er tað skilagott at leggja lívfiskavirksemi burtur frá aðrari aling, sigur Bakkafrost.
Nýggja lívfiskastøðin fer eftir ætlan at veita rogn til alt virksemið hjá Bakkafrosti í Føroyum og part av virkseminum hjá The Scottish Salmon Company í Skotlandi, sum Bakkafrost eigur.