Flúgvingin millum Ísland og Grønland steðgar

Tað skrivar grønlendska kringvarpið, KNR, á heimasíðuni. Óvist er, hvussu leingi loftrúmið millum Ísland og Grønland verður stongt.

– Vit mugu verja okkum fyri vaksandi smittutrýstinum í heiminum í løtuni, sigur Niels Ulrik Winther, leiðari fyri koronutilbúgvingini í Grønlandi.

Eingin í Grønlandi deyður av smittuni

Air Greenland vil ikki upplýsa fyri KNR, hvussu nógv ferðafólk flúgva um vikuna úr Íslandi til Grønlands.

Higartil hava 5.078 fólk í Íslandi fingið staðfest COVID-19. 20 fólk í landinum eru deyð av smittuni vísa almennu tølini fyri Ísland.

Í Grønlandi hava tilsamans 17 fólk havt smittuna, øll eru útskrivað aftur og eingin er deyður av smittuni har, skrivar KNR.