Fáa nú heimild at taka minkarnar av

Danska stjórnin fekk í gjárkvøldið neyðugu undirtøkuna, so at allir minkar í landinum kunnu takast av, skrivar DR.

Tað hevur verið órógv í fólkatinginum, síðani Mogens Jensen, matvøruráðharri, 4. november gav boð um at taka allar minkar av, tí tað vísti seg, at einki lógargrundarlag var fyri avgerðini.

Men í gjárkvøldið fekk stjórnin neyðugu undirtøkuna frá stuðulsflokkunum, Eindarlistanum, SF, Radikala Flokkinum og Alternativinum.

Borgarligu flokkarnir, Vinstri, Konservativi flokkurin og Danski fólkaflokkurin, fóru úr burtur úr samráðingunum.

Vilja hava ráðharran frá

Uppskotið, sum gevur stjórnini loyvi at taka minkarnar av, skal nú samtykkjast í fólkatinginum.

Nógv hava kravt, at Mogens Jensen, matvøruráðharri, verður koyrdur úr starvinum. Tann avgerðin verður helst tikin fyrsta dagin.

Ráðharrin er longu farin í samráð í morgun, og Eindarlistin og Radikali flokkurin hava boðað frá, at ein avgerð um framtíðina hjá ráðharranum skal takast hesa vikuna.

Flokkarnir eru eisini samdir um, at tey, sum reka minkagarðar, skulu fáa endurgjald.