Manningarviðurskiftini um at verða loyst

Er Jákup Sverri fiskiskip ella handilsskip? Tað hevur verið stóri spurningurin í Fiskimálaráðnum og hjá øðrum, sum hava við skipið at gera.

Jacob Vestergaard, landsstýrismaður í fiskivinnumálum, hevur verið og er framvegis púra greiður: Jákup Sverri er fiskiskip.

Hans Jóhannes á Brúgv, stjóri í Sjóvinnustýrinum, hevur eisini verið eins greiður: 

- Um vit skráseta Jákup Sverra sum annað enn handilsskip, so bróta vit lógina. Og tað vil eg ikki, hevur hann sagt við útvarpið. 

Loysn í eygsjón

Hóast hvørgin parturin hevur viljað slakað, er ein loysn í eygsjón, sum partarnir tykjast vera nøgdir við.

- Fiskimálaráðið hevur biðið um, at manningin á Magnusi Heinason, sum varð skrásettur sum fiskiskip, skal kunna mynstra við nýggja skipinum. Vit hava kannað og hugt at treytunum, og niðurstøðan er, at dekkarar og kokkur kunnu mynstra, sum talan er um fiskiskip. Teir, sum eru á brúnni, mugu tó hava vinnubrøv til handilsskip, sigur Hans Johannes á Brúgv, stjóri í Sjóvinnustýrinum.

Vilja varðveita manningina

Kringvarpið hevur fingið innlit í málið, og har sæst millum annað, at Eilif Gaard, stjóri á Havstovuni, í skrivi 15. januar í ár til Fiskimálaráðið hevur grundgivið fyri týdninginum, at fiskimenn fara at manna nýggja havrannsóknarskipið:

"Tað er umráðandi, at vit kunnu varðveita verandi manning, sum vit hava á Magnusi Heinason. Manningin kennir arbeiðsgongdirnar, trolleiðirnar og dugir stak væl við øllum teimum mongu trolunum, sum vit brúka. (Vit brúka eitt stórt tal av ymiskum botn- og uppsjóvartrolum, teir sera ymisku túrarnar, sum vit hava. Uml. 80% av tíðini verða trol brúkt.
Vit eru væl stillað við stak dugnaligum og royndum trol- og brúgvafólki." 

Kann liva við støðuni

Jacob Vestergaard, landsstýrismaður, vil ikki gera samrøðu við útvarpið, men hann sigur tó, at um manningarviðurskiftini á Jákupi Sverra kunnu vera sum hjá fiskiskipi, so kann hann liva við støðuni, sjálvt um skipið verður skrásett sum handilsskip.

Landsstýrismaðurin vísir á, at nakrir snøklar eru eftir, og hann vil ikki úttala seg um málið, fyrr enn alt er avgreitt.

Tað er framvegis skipasmiðjan Mest, sum er skrásett at vera eigari av havrannsóknarskipinum. Nógv varð annars gjørt burutur úr á Skála 31. oktober, tá ið Jákup Sverri fekk navn og skuldi latast Fiskimálaráðnum.

Mouritz Mohr, stjóri á Mest, og landsstýrismaðurin vænta, at havrannsóknarskipið verður latið landinum fyrsta dagin.