Nú eru 11.000 milliardir í oljugrunninum

Norski oljugrunnurin eigur nú meir enn 11.000 milliardir kr., og tað er ikki meir enn eitt ár síðani, at grunnurin fór upp um 10.000 milliardir kr.

Grunnurin misti fitt av inntøkum, tá koronusmittan fór at gera um seg í vár, og eitt skifti í mars var virðið  9.300 milliardir kr.

Síðani er virðið vaksið aftur, og í vikuni fór tað upp um 11.000 milliardir kr.

Partabrøv í 9.000 fyritøkum

Um ársskiftið uppýsti grunnurin at hann hevði sett pengar í, ella keypt partabrøv í 9.202 ymiskum feløgum kring heimin.

Tað verður av nógvum hildið at vera ov nógv, og at grunnurin átti at havt pening í færri fyritøkum.

Hvussu útlitini hjá oljugrunninum eru, verður nógv gitt um, men higartil hevur grunnurin tryggjað vælferðina í Noregi, og hóast nógv ivamál hava verið av koronufarsóttini, so hevur ikki verið neyðugt hjá norsku stjórnini at broyta búskapargongdina í landinum.