1.700 ferðafólk í sóttarhaldi

1.700 ferðafólk á einum ferðamannaskipi eru í løtuni í sóttarhaldi, eftir eitt ferðafólk fekk staðfest koronusmittu. Tað skrivar Ritzau-tíðindastovan.

Skipið, sum eitur Quantum of the Seas, fór úr Singapore mánadagin, og skuldi sigla við ferðafólkunum í fýra dagar. Tað vendi aftur til Singapore tíðliga í morgun, tá eitt ferðafólk vísti sjúkueyðkenni og fekk staðfest COVID-19 virus.

Øll ferðafólkini eru nú avbyrgd á kømrum sínum umborð, og tey sleppa ikki í land fyribils. Reiðaríið sigur tó, at tey sleppa í land, tá smittusporingin er liðug.

AFP-tíðindastovan sigur, at hetta er enn ein smeitur fyri ferðaskipavinnuna, sum hevur verið sera meint rakt av farsóttini.