Vilja fongsla Sarkozy í fýra ár

Franska ákæruvaldið mælir til at fonglsa fyrrverandi forsetan, Nicolas Sarkozy, í fýra ár.

Tað ger ákæruvaldið í sambandi við eitt rættarmál, har fyrrverandi forsetin er ákærdur fyri mutur.

Hann er ákærdur fyri at vilja mutra ein dómara og bjóða honum eitt gott starv aftur fyri upplýsingar í eini kanning, sum kannaði fíggjarviðurskifti í valstríðnum hjá Sarkozy.

Sarkozy fekk sambært ákærunum ólógligan stuðul frá L'Oréal-arvingunum til forsetavalstríðið í 2007.

Vísir ákærunum aftur

Sarkozy var forseti frá 2007 til 2012. Hann segði í rættinum í gjár, at hann ongantíð hevði mutrað, og lovaði at stríðast til tað síðsta til tess at prógva, at hann er ósekur.

Hann fegnaðist samstundis um, at hetta málið nú er komið fyri rættin, so hann hevur møguleika at prógva, at hann er ósekur.

Sarkozy er eisini ákærdur fyri at hava tikið ímóti fleiri milliónum evrum frá fyrrverandi einaræðisharranum í Libya, Muammar Gaddafi, til valstríðið í 2007, og at svika við pengum í valstríðnum  í 2012, tá hann ikki varð afturvaldur.