Útlendingar skulu ikki kunna keypa í sama mun

Tað sigur Bárður á Steig Nielsen, løgmaður, í svari til ein §52a fyrispurning, sum Jóhannis Joensen, tingmaður fyri Javnaðarflokkin, hevur sett. 

Tingmaðurin spurdi, um løgmaður ætlar at seta í verk forðingar, at loyva útlendingum at keypa fastogn í Føroyum. 

Í svarinum verður upplýst, at løgmansskrivstovan arbeiðir við málinum, men at ávís ivamál eru. 

Lógaruppskotið sent til ummælis fyrst í 2021

– Eg haldi, at endamálið við at áseta reglur á hesum økinum eigur at vera, at vit onkursvegna tryggja okkum, at tey, sum eiga fastogn í Føroyum, hava tilknýti til Føroyar.

– Eisini er neyðugt at byrgja uppfyri, at útlendingar ikki eiga alt ov nógvar fastognir í ávísum økjum í landinum. Hinvegin mugu vit heldur ikki seta óneyðugar forðingar fyri útlendskum vinnuvirksemi í Føroyum, svarar løgmaður.

Løgmaður væntar, at lógaruppskotið er klárt at senda til ummælis fyrst í komandi ári.