Kvinnuhúsið ikki fleiri pengar í fyrsta umfari

Í fyrsta umfari fær Kvinnuhúsið ikki fleiri pengar næsta ár enn í ár. Men fleiri og neyvari hagtøl verða gjørd.

Elsebeth Mercedis Gunnleygsdóttur, landsstýriskvinna, hevur svarað Hervør Pálsdóttir, løgtingskvinnu, sum spurdi um Kvinnuhúsið.

Kvinnuhúsið hevur fingið 50 prosent fleiri fráboðanir um harðskap í ár enn í fjør. Í 2019 fekk Kvinnuhúsið 604 fráboðanir um harðskap.

Pengar játtaðir til at útvega hagtøl

Í ár fær Kvinnuhúsið eina millión og 765.000 krónur til raksturin úr landskassanum. Hetta eru 400.000 krónur meira enn í 2019.

Sama tal, ein millión og 765.000 krónur, er í uppskotinum um fíggjarlóg fyri 2021. Í ár eru eisini játtaðir pengar til at útvega hagtøl um harðskap.

– Fáa vit nágreinilig tøl, sum lýsa hetta økið, ber eisini betur til at leggja arbeiðið til rættis. Hetta hevði tí eisini komið Kvinnuhúsinum til góðar, sigur Elsebeth Mercedis Gunnleygsdóttur.