Met nógv fólk í USA deyð av koronu

Í gjár doyðu 3.309 fólk í USA av smittuni, og 231.755 fólk fingu staðfest smittuna. Bæði tølini hava sett nýggj met.

Tað vísir ein uppgerð frá Johns Hopkins University, skrivar amerikanska sjónvarpsstøðin, NBC Washington, sambært tíðindastovuni, Ritzau.

Samstundis nærkast talið á deyðum í USA 298.000 fólkum. Ringast stendur til í New York, har meira enn 35.000 fólk higartil eru deyð av smittuni.

Koppseting kann brúkast í neyðstøðum

Heilsumyndugleikarnir í USA góðkendu fríggjadagin, at koppsetingin hjá Pfizer og BioNTech kann brúkast í neyðstøðum í USA.

Tað kunngjørdi forsetin, Donald Trump, á Twitter leygarnáttina okkara tíð. Í fyrsta umfari verða tað eldri fólk og heilsustarvsfólk, sum fáa koppsetingina, sigur forsetin.

USA tað sætta landið í heiminum - eftir Stóra Bretland, Kanada, Meksiko, Saudiarabia og Bahrain - sum hevur góðkent koppsetingina hjá teimum báðum heilivágsfyritøkunum.