Trump í telefonsamrøðu: Finn fleiri atkvøður

Donald Trump hevur í telefonsamrøðu heitt á innanríkisráðharran í Georgia, Brad Raffensperger, um at finna 11.780 atkvøður afturat.

Atkvøður, ið høvdu broytt úrslitið av forsetavalinum í Georgia, skrivar Washington Post. Samrøðan, sum vardi í slakan tíma, varð upptikin leygardagin.

Sáddi iva um úrslitið beinanvegin

Nývaldi forsetin í USA, Joe Biden, vann valið í Georgia. Tað var eftir fínteljing, tí lutvíst fáar atkvøður vóru á muni millum valevnini.

Trump sáddi alt fyri eitt iva um úrslitið á forsetavalinum í november. Hann vildi vera við, at valsvik er farið fram, og at Joe Biden av órøttum vann forsetavalið.

Allir statir hava annars góðkent valið og staðfest, at Joe Biden vann forsetavalið. Joe Biden tekur við sum forseti í USA tann 20. januar.