Torført hjá Løkke at stovna nýggjan flokk

Tað verður ikki sum at siga tað hjá Lars Løkke Rasmussen, sum nú er uttanflokkamaður á fólkatingi, at stovna nýggjan flokk. 

Martin Lidegaard og Jens Rohde í Radikala flokkinum hava verið nevndir sum tveir fólkatingsmenn, ið kanska høvdu áhuga at stovna nýggjan flokk, men teir siga báðir, at eingin ætlan er um tað.

Og nú hevur fyrrverandi búskapar- og innanríkisráðharrin, Simon Emil Ammitzbøll-Bille, eisini gjørt greitt, at hann fer ikki at stovna nýggjan flokk saman við Lars Løkke Rasmussen.

Simon Emil Ammitzbøll-Bille og Christina Egelund tóku seg bæði úr Liberal Allince, og stovnaðu flokkin Framá. Men í fjør góvust tey við royndini at útvega nýggja flokkinum undirskriftir.

Brúk fyri royndum politikarum

Politiski redaktørurin á BT, Henrik Qvortrup, sigur, at tað verður ikki sum at siga tað hjá Løkke at stovna nýggjan flokk, tí hann hevur brúk fyri royndum politikarum aftrat sær.

Nú kann hann verða noyddur at leita eftir fólki í sínum gamla flokki, men tað verður ikki lætt, sigur Henrik Qvortrup.

Lars Løkke Rasmussen boðaði á nýggjárinum frá, at hann tók seg úr Vinstraflokkinum. 

Hann hevur verið limur í Vinstra í 40 ár, floksformaður, ráðharri og forsætisráðharri í tveimum umførum.