Rinda 100 milliónir í tolli og avgjøldum

Tað hevur skund at fáa handilsavtalu í lag millum Grønland og Bretland, sigur grønlendska vinnuhúsið í brævi til landsstýrismannin í uttanríkismálum, Steen Lynge.

Formaðurin í Grønlands Erhverv, Christian Keldsen, sigur við Sermitsiaq, at í løtuni noyðast grønlendskar útflutningsfyritøkur at rinda 100 milliónir krónur í tolli og avgjøldum fyri at fáa vørur á bretska marknaðin.

Tað loysir seg ikki at útflyta rækju og tosk til Bretlands, sigur hann.

Tollurin er 20 prosent

Bretland hevur lagt 20 prosent toll á vørur úr Grønlandi síðani Bretland fór úr ES á nýggjárinum. Hetta er eisini galdandi fyri fiskavørur úr Íslandi, Noregi, Kina og Kanada, um tær verða innfluttar til Danmark, áðrenn tær verða fluttar út til Bretlands.

Henda støðan hevur eisini rakt Royal Greenland og Polar Seafood. Grønland er nú at meta sum triðjaland í Bretlandi, tá grønlendingar útflyta fiskavørur um Danmark til Bretlands.

Christian Keldsen sigur, at fyritøkur, sum grønlendska vinnuhúsið hevur havt samband við, siga, at tað fer at kosta fyritøkunum millum 65 og 100 milliónir í tolli og avgjøldum, til tað hevur eydnast at fáa eina handilsavtalu við Bretland.