Forsetaskiftið bæði í útvarpi og sjónvarpi

Nógv verður gjørt burturúr, bæði í útvarpi og sjónvarpi, at Joe Biden verður tikin í eið sum nýggjur amerikanskur forseti seinnapartin.

Samstundis verður Kamala Harris tikin í eið sum fyrsti kvinnuligi varaforseti í USA.

Eyka Dag og Vika

Í sjónvarpinnum verður eyka tíðindasending. 

Brynhild Thomsen, journalistur, og Páll Holm Johannesen, stjórnmálafrøðingur, vera í sjónvarpsstovuni og gera viðmerkingar til hendingarnar og politisku støðuna í USA.

Dagur og Vika tosar eisini við René Eidesgaard, sum býr í Washington, og Regin Winther Poulsen, sum er á staðnum í Washington fyri Kringvarpið.

Dagur og Vika byrjar klokkan 16.25

Breddin

Breddin í útvarpinum byrjar klokkan 17, og hann viðger í dag burturav forsetaskiftið í USA.

Í sendingini vera m.a. Tóri Højgaard, sum fylgir væl við amerikanskum politikki, Sigmund Ísfeld, føroyskur sendimaður í Kina, Heini í Skorini, Ph.D í altjóða politikki, og Martin Breum, tíðindamaður, sum hevur serligan áhuga fyri arktiskum viðurskiftum.

Í Breddanum frætta vit eisini frá Regini Winther Poulsen í Washington.