Eingin lækni í føstum starvi 1. mars

Frá 1. mars verður eingin kommunulækni í føstum starvi í Suðuroynni. Dorrit Bech Joensen í Vági fer í farloyvi 1. mars. Hon hevur fingið farloyvi í eitt ár.

Og 28. februar gevst Signar Dam á Tvøroyri. Í Suðuroynni eru fýra kommunulæknastørv. Í løtuni eru avloysarar í tveimum teirra.

Um ikki eydnast at fáa kommunulæknar í fast starv fyri 1.mars, vera bara avloysarar í kommunulæknastørvunum í Suðuroynni.

Eingin søkir

Heilsutrygd hevur oftari enn einaferð søkt eftir kommunulæknum í fast starv í Suðuroynni, men sum oftast uttan úrslit.

Seinast var nú í januar. Umsóknarfreistin var 12. januar. Søkt varð eftir trimum læknum. Eingin søkti.

1. apríl tekur Djóni S. Joensen við sum kommunulækni í Vágum. Og tá vera fastir kommunulæknar í báðum størvunum har.

Djóni S. Joensen hevur verið lækni í Vestmanna læknadømi, í Kollafirði, síðani 2011.