Flogfar sunnan fyri Føroyar fekk trupulleikar

Eitt farmaflogfar hjá Bluebird Nordic, av slagnum Boeing 737, sendi í gjár út neyðfráboðan, Squawk 7700, sum er kotan fyri óvanligar neyðstøður. 

Tað skrivar skotska blaðið, The Herald, á netinum. Flogfarið var tá statt beint sunnan fyri Føroyar. Flogfarið fór úr Dublin tíðliga í gjáramorgunin við 7,2 tonsum av farmi, sum skuldu flytast til Keflavík í Íslandi. 

Vórðu ávarað

Eftir at hava boðað frá neyðstøðuni, vendi flogfarið aftur, og varð beint inn á aðra leið. Tað lendi 50 minuttir seinni í øllum góðum á flogvøllinum í Aberdeen í Skotlandi.

Neyðtænastan í Dublin og Aberdeen siga, at tey vórðu ávarað um, at flogfarið møguliga fór at hava trupulleikar við at seta seg. Trý fólk vóru við flogfarinum, og tey settu beinan vegin neyðugu tiltøkini í verk, sigur Bluebird Nordic við The Herald.

Kanningar hava víst, at trupulleikar vóru við trýstinum í flogfarinum. Flogfarið hoyrir til flotan hjá Bluebird Nordic við fimm flogførum, sum hava støð í Reykjavík í Íslandi, og tey flúgva við farmi millum Ísland og Evropa, skrivar blaðið.