Málið um Koks ikki búgvið enn

Friðingarnevndin í Streymoyar sýslu skuldi í gjár viðgera ætlanina hjá Gist og Vist at byggja matstovuna Koks við Fossdalsgjógv við Velbastað.

Men viðgerðin er útsett, tí málið er ikki búgvið, sigur Finnbogi Midjord, sýslumaður og formaður í friðingarnevndini.

Orsøkin er, at bóndin, sum hevur hagan, hevur kært til Umhvørvisstovuna. Og tann kæran er ikki avgreidd enn.

Nýggja serstaka byggisamtyktin fyri Fossdalsgjógv við Velbastað er nú til hoyringar. Hoyringarfreistin er til 15.februar.

Biðja um mótmæli ella broytingaruppskot

Býráðið samtykti 17.desember uppskot um nýggja serstaka byggisamtykt.

Býráðið biður um møgulig mótmæli ella broytingaruppskot, nú uppskotið er til hoyringar.

Uppskotið um at broyta byggisamtyktina verður síðani saman við mótmælum og broytingaruppskotum sent Býarskipanarnevnd landsins, sum ger tilmæli til landsstýrismannin í kommunumálum, Helga Abrahamsen. 

Hann tekur síðani avgerðina um byggisamtyktina.