Inger Støjberg fyri ríkisrætt

Fyrrverandi danski ráðharrin í útlendinga- og integrasjónsmálum, Inger Støjberg, skal fyri ríkisrætt.

Tað hevur ein stórur meiriluti av fólkatinginum samtykt fyri løtu síðani.

139 atkvøddu fyri, og 30 atkvøddu ímóti.

Formaðurin í fólkatinginum, Henrik Dam Kristensen, letur nú formanninum í ríkisrættinum, Thomas Rørdam, málið.

Áðrenn atkvøtt var um málið, tók Inger Støjberg uppaftur, at hon er ósek í málinum um at skilja pør, sum hava biðið um politiskt friðskjól í Danmark, sundur.

- Ein stórur meiriluti heldur, at eg eri sek. Men  eg veit, at eg ikki gav nøkrum boð um at gera nakað ólógligt, segði Inger Støjberg. 

- Eg legði uppí, og eg standi fast við, at tað var tað einasta rætta at gera, bæði politiskt og menniskjaligt, segði hon.