Bjóða nú Sjóvinnustýrið út

Arbeiðið at byggja Sjóvinnustýrinum skrivstovubygning á Giljanesi er nú boðið út.

Bygningurin er boðin út sum heildararbeiðstøka.

Tann, sum vinnur útboðið, skal tekna, projektera og byggja. Freistin at bjóða er til á middegi 19.mars.

5,3 mió. settar av í ár

Málið um byggingina er ikki nýtt.  Løgtingið samtykti í 2017, at Sjóvinnustýrið skuldi byggja í Vágum fyri í mesta lagi 13,7 mió. kr.

Verklagslógin um byggingina varð samtykt á vári 2018.  Í fíggjarlógini í ár eru 5,3 mió. kr. til byggingina.

Sjóvinnustýrið hevur síðani á sumri 2016 húsast í fyribilshølum í Havn, eftir at stovnurin noyddist at flyta úr leigaðum hølum í Miðvági, sum ikki vóru mett at vera egnað.