Mótmæla ætlanini at flyta børn í Eysturskúlan

Skúlin á Fløtum í Havn, sum er ein samanlegging av Kommunuskúlanum og Venjingarskúlanum, er ov lítil.

Tað hevur við sær, at pláss er ikki fyri øllum næmingum, sum skulu í fyrsta flokk í nýggja skúlaárinum, og tí verður neyðugt at flyta næmingar í Eysturskúlan, sum er í hinum endanum av býnum.

Støðan hevur fingið foreldur í vesturbýnum at rópa varskó. Tey eru farin at savna undirskriftir móti ætlanini, og higartil hava meira enn 300 fólk skrivað undir.

Skúlin á Fløtum ásannar, at skúlin er ov lítil, og hevur gjørt av, at børn, sum ganga í forskúla á Fløtum, skulu hava fyrsta rætt at sleppa í fyrsta flokk í Skúlanum á Fløtum.