Barnloysi: Fáa nú viðgerð í Keypmannahavn

Landssjúkrahúsið sendir nú sjúklingar, ið hava tørv á viðgerð fyri barnloysi, til fertilitetsklinikk í Keypmannahavn. 

Støðan viðvíkjandi koronu hevur verið atvoldin til, at stígur er komin í viðgerðirnar, sum hava verið gjørdarí Íslandi seinnu árini. 

Men nú fer væntandi at bera til at bjóða viðgerð, hóast umstøðurnar.

Pørini, sum hava bíðað longst, verða send til viðgerðar fyrst, og pør, ið eru nær aldursmarkinum fyri viðgerð, verða eisini raðfest.

Fáa boð frá Landssjúkrahúsinum

Landssjúkrahúsið setur seg í samband við tey fáu pørini, ið eru í viðgerðargongd, og hava fryst egg í Íslandi um, hvussu víðari skal farast fram, skrivar Landssjúkrahúsið á heimasíðuni.

Tey, ið hava fingið játtað viðgerð, fáa boð frá Landssjúkrahúsinum, tá ið tey skulu byrja í viðgerð. 

Tað kann taka eina tíð, áðrenn øll hava fingið boð.