Kærur um, at Jehova Vitni goyma upplýsingar

Norska dátueftirlitið kannar Jehova Vitni, eftir at fleiri kærur eru um, at felagsskapurin ólógliga goymir persónsupplýsingar.

Kærurnar snúgva seg um, at fólk fáa ikki fult innlit í persónsupplýsingar, og at upplýsingarnar ikki verða strikaðar sambært persónsverndarlógini, upplýsir norska dátueftirlitið í tíðindaskrivi. 

Tey, sum kæra, hava av ymsum orsøkum verið innkallað í sonevndu "dømandi nevndina" hjá Jehova vitnum. Tað hevur í mesta mun verið í sambandi við kynslig viðurskifti. 

Dømandi nevndin skrivar frágreiðing frá hesum fundum, og tey, sum kæra, stúra fyri, at upplýsingarnar um kynsligu viðurskiftini verða goymdar.

Dátueftirlitið spyr

Í fyrstu atløgu hevur dátueftirlitið sent Jehova Vitnum bræv við spurningum, um tað er felagsskapurin hjá Jehova Vitnum, ella einstakar samkomur, sum hava ábyrgdina av persónsverndarreglunum, stendur í tíðindaskrivinum. 

- Kjarnin í persónsverndarlógini er, at hvør einstakur í mest møguligan mun skal hava tamarhald á, hvørjar upplýsingar verða goymdar, og hvat upplýsingarnar skulu brúkast til. Og tað hevur serliga týdning, tá talan er um viðkvæmar upplýsingar, og í einum trúarsamfelagi, har valdsbýtið millum leiðara og vanligar limir eru ójavnt, sigur Bjørn Erik Thon, stjóri í norska Dátueftirlitinum.

Jehova vitni skal svara í seinasta lagi 4. mars.