Viðgera radaran í tinginum í dag

Radarin, sum Danmark vil sleppa at byggja í Føroyum, verður viðgjørdur í løgtinginum í dag.

Jenis av Rana, landsstýrismaður, skal ráðføra seg við Uttanlandsnevndina um lofteftirlitsradara klokkan níggju í morgun.

Og á tingfundinum klokkan ellivu skal tingið viðgera uppskotið til samtyktar hjá Tjóðveldi um hernaðarmál.

Tjóðveldi heldur, at nú er neyðugt aftur at staðfesta, at Føroyar og føroyingar skulu ikki brúkast sum amboð hjá øðrum í hernaðarmálum og í trygdarmálum.

Landsstýrið skal alt fyri eitt boða donsku stjórnini og altjóða samfelagnum frá, at bara Føroya fólk og løgtingið gera av, hvat verður gjørt í hernaðarmálum og trygdarmálum á landi, sjógvi og í loftrúminum í Føroyum, sigur Tjóðveldi í uppskoti sínum til samtyktar.